தலைவர்களும், தொண்டர்களும்... இது தமிழகத்தின் தனித்துவம்!

கட்சி தலைவர்களை, தொண்டர்கள் பட்டப்பெயரால் அழைப்பதும், தலைவர்கள் தொண்டர்களை வாஞ்சையோடு அரவணைப்பதும், காலம் காலமாக நடக்கிறது. திருக்குவளை முத்துவேல் கருணாநிதி என்ற பெயர், முதலில் சுருங்கி, பின்னர் மறைந்து, 'கலைஞர்' என்றானதும், மருதுார் கோபாலன் ராமச்சந்திரன், எம்.ஜி.ராமச்சந்திரனாகி பின்னர், 'எம்.ஜி.ஆர்.,' என்ற, மூன்றெழுத்தில் நிலைபெற்றதும் வரலாறு.

முன்னவர் தன் தொண்டர்களை, 'என் உயிரினும் மேலான உடன்பிறப்பே' என அழைத்ததும், சின்னவர் 'ரத்தத்தின் ரத்தமான உடன்பிறப்புக்களே...' என, அதற்கு மெருகேற்றியதும், தமிழக அரசியல் வரலாற்றில் தனித்து நிற்கும் அத்தியாயம். தற்போதைய தலைவர்களை, தற்போதைய தொண்டர்கள் எப்படி அழைக்கிறார்கள் என, கவனித்து இருக்கிறீர்களா?அ.தி.மு.க., ஒருங்கிணைப்பாளர், ஓ.பன்னீர்செல்வம், ஓ.பி.எஸ்., என, சுருங்கி விட்டார். துணை ஒருங்கிணைப்பாளர் இடைப்பாடி பழனிசாமி இப்போது, இ.பி.எஸ்., எனும், மூன்றெழுத்தில் அடங்கி விட்டார்.


சுவர் விளம்பரம் எழுதுவோருக்கும், 'எட்டு பிட்' போஸ்டரில் எழுதவும், இது ரொம்ப சுலபமாக இருக்கிறது. தலைவர்கள் பெயரை தொண்டர்கள் இப்படி சுருக்கினால், பதிலுக்கு அவர்கள் ஏதாவது செய்ய வேண்டாமா? அ.தி.மு.க., தலைவர்கள் தம் தொண்டர்களை பெயர் சொல்லியும், நிர்வாகிகளை, 'மாவட்டம்... எப்படி இருக்கீங்க...' , 'ஒன்றியம்...வாங்க...' என, அவர்கள் வகிக்கும் பதவிகளை சொல்லியும் அழைக்கின்றனர். வட்டம், மாவட்டம் என்ற பதவி பெயர்களை, சோ தன் பத்திரிகையில் வட்ட வட்டமாக போட்டு கிண்டல் செய்வார்.

தி.மு.க., தலைவர் மு.க.ஸ்டாலினை, தொண்டர்கள் முதல் நிர்வாகிகள் வரையிலும், 'தளபதி' என்று அழைக்கின்றனர். தலைவர் என்ற பதவிப் பெயர் இன்னமும், கருணாநிதியுடன் அடையாளப்படுத்தும் நிலை இருப்பதால், தளபதி மாறாமல் நின்று விட்டது.கம்யூனிஸ்ட்கள், 'தோழரே' அல்லது, 'காம்ரேட்' என்று தான், ஒருவரை ஒருவர் அழைக்கின்றனர். உலகம் முழுதும் அப்படித்தானாம். இதில் ஒரு வசதி, மரியாதை சொற்கள், பதவிப் பெயர் போன்ற, எதையும் தேடி எடுத்து பயன்படுத்த தேவையில்லை. தேசிய தலைவர் வரை எல்லோரையுமே, 'தோழர்' என, அழைத்து, நேராக, 'மேட்டருக்கு' போய்விடலாம்.

என்றாலும், கட்சியின் மாநில தலைவர்களை, 'இனிஷியல்' மற்றும் பெயரின் முதல் எழுத்துகளை சேர்த்து சுருக்கி அழைக்கின்றனர். மறைந்த தா.பாண்டியனை, 'தா.பா.,' என்பர். இரண்டு எழுத்துக்கும் நடுவே, இடைவெளி விடத் தெரியாதவர்கள், முழு பெயரையும் சொல்லி விடுவார்கள்.மூத்த தலைவர் ஆர்.நல்லகண்ணுவை, 'ஆர்.என்.,' என்று அழைப்பது வழக்கம். இந்திய கம்யூ., மாநில செயலர் இரா.முத்தரசனை, 'ஆர்.எம்.,' என்றும், மார்க்சிஸ்ட் கம்யூ., மாநில செயலர் கே.பாலகிருஷ்ணனை, 'கே.பி.,' என்றும் அழைக்கின்றனர்.


தே.மு.தி.க., தலைவர் விஜயகாந்த் கப்பல், 'ஓனர்' இல்லை என்றாலும், கட்சிக்காரர்களுக்கும், ரசிகர்களுக்கும் அவர் என்றென்றும், 'கேப்டன்'தான். கேப்டனின் மனைவியை, 'அண்ணியார்' என்று அழைக்கின்றனர் .பா.ம.க., நிறுவனர் ராமதாசை, 'மருத்துவர் அய்யா' என்றும், மகன் அன்புமணியை, 'சின்னஅய்யா' என்றும், அழைக்க வேண்டும் என்பது கட்சி, 'லெட்டர் பேடில்' எழுதப்பட்ட விதி.

ராமதாஸ் மருத்துவர் என்பதால், புதிய தமிழகம் கட்சி தலைவர் கிருஷ்ண சாமியை, கட்சியினர், 'டாக்டர் அய்யா...' என்று அழைக்கின்றனர். அவரது மகன் டாக்டர் ஷ்யாம், இந்த தேர்தலுக்கு தான் வந்திருக்கிறார். அவரை, 'இளைய டாக்டர் அய்யா' என, அழைக்கலாமா... 'டாக்டர் இளைய அய்யா' என, அழைக்கலாமா என, சாலமன் பாப்பையாவிடம் கேட்டுள்ளனர். அவர் இன்னும் தீர்ப்பு சொல்லவில்லை. கிருஷ்ணசாமி பெரும்பாலும், அனைவரையுமே பெயர் சொல்லி அழைக்கிறார்.


விடுதலை சிறுத்தைகள் தலைவர் தொல்.திருமாவளவனை, கட்சியின் இரண்டாம் கட்ட தலைவர்கள் முதல், புதிதாக சேர்ந்தவர்கள் வரையிலும், 'அண்ணன்' என்றழைக்கின்றனர். திருமா, நெருக்கமானவர்களை பெயரைச் சொல்லி ஒருமையில், நீ... வா... என்றும் புதியவர்களை கொஞ்சம் தள்ளி வைத்து நீங்க...வாங்க... என்றும் அழைக்கிறார்.

த.ம.மு.க., தலைவர் ஜான்பாண்டியனை கட்சியினர், 'அண்ணன்' என்று தான் அழைக்கின்றனர். ம.தி.மு.க., நிறுவனர் வைகோ, 'பொதுச் செயலர்' என்ற, பொறுப்பின் பேரால் அழைக்கப்படுகிறார்.த.மா.கா., தலைவர் ஜி.கே.மூப்பனார் இருந்தவரையிலும், 'அய்யா' என்று அழைக்கப்பட்டார். அவரது வாரிசான, ஜி.கே.வாசனை, 'வாசன் அய்யா' என்று நிர்வாகிகள் அழைக்கிறார்கள்.


வாசன் யாரை அழைத்தாலும் பெயரோடு, 'சார்' சேர்த்து, 'சரவணன் சார்... முருகேசன் சார்...' என, மரியாதையுடன் அழைக்கிறார். யாரையுமே சார் சேர்க்காமல் அழைப்பதில்லை.தமிழ்நாடு காங்கிரஸ் கமிட்டி தலைவர் கே.எஸ்.அழகிரியை, கட்சியினர், 'தலைவர்' என்றே அழைக்கின்றனர். அவரும் மரியாதையுடன், 'நீங்க...வாங்க...' என்று தான் பிறரை அழைக்கிறார். ப.சிதம்பரம், 'சூப்பர் சீனியர்' என்பதால், 'அய்யா' என்று அழைக்கப்படுகிறார்.

நாம் தமிழர் கட்சி தலைவர் சீமானை கட்சியினர், 'அண்ணன்' என்று அழைக்கின்றனர். அவரும், 'ஹாஹாா...' என, வெடிச் சிரிப்புடன், 'வாடா தம்பீ' என்கிறார். சீமானின் ஒரே அண்ணன் விடுதலைப் புலி பிரபாகரன் மட்டும். மற்ற எல்லோரையும், 'தம்பி' என்றே அழைக்கிறார்.

மய்யம் தலைவர் கமல், 'சார்' என, குறிப்பிடப்படுகிறார். சமத்துவ மக்கள் கட்சி தலைவர் சரத்குமார், 'நாட்டாமை' என்ற பட்டப்பெயரால் அழைக்கப்படுகிறார். சீசனுக்கு தக்க இது மாறும். 'சித்தி' ராதிகாவின் கணவர் என்பதால், 'சித்தப்பா' பட்டமும் கிடைத்துள்ளது. நெருக்கமானவர்கள் அண்ணன் என்றும், மற்றவர்கள் தலைவர் என்றும் அழைக்கின்றனர்.


பாரதிய ஜனதா கட்சி நிர்வாகிகளை கட்சியினர், பெயர் முடிவில், 'ஜீ' சேர்த்து அழைப்பார்கள். இல.கணேசன் ஜீ... எச்.ராஜா ஜீயை தொடர்ந்து, தற்போதைய தலைவர் எல்.முருகன் ஜீ என்றே அழைக்கப்படுகிறார். ஆனால், நயினார் நாகேந்திரன் அ.தி.மு.க.,வில் இருந்து வந்ததாலோ என்னவோ, பா.ஜ.,வில் துணைத்தலைவர் ஆன பிறகும் அவரை யாரும் ஜீ போட்டு அழைப்பதில்லை....இன்னும், 'அண்ணாச்சி'யாகவே நீடிக்கிறார்.


சசிகலா சூடிய பட்டம், 'சின்னம்மா'. தினகரனை, யாரும் பொதுச்செயலர் என்றோ, தலைவர் என்றோ அழைப்பதில்லை. அ.ம.மு.க.,வில், 'சார்' என்றால், அது தினகரனை மட்டுமே குறிக்கும்.சமீப காலமாக, தி.மு.க.,வினர், 'பி.கே.சார்... பி.கே.சார்...' என, செம மரியாதையுடன் ஒரு பெயர் சொல்கின்றனர். அவர் தான் இந்த தேர்தலில், தி.மு.க.,வின் தலையெழுத்தை தொழில்நுட்பத்தால் திருத்திக் கொண்டிருக்கும், 'ஐ - பேக்' நிறுவன தலைவர் பிரஷாந்த் கிஷோர்.



வாசகர் கருத்து

முதல் நபராக கருத்து தெரிவியுங்கள்!
Login via Dinamalar:
New to Dinamalar ?
(Press Ctrl+g to toggle between English and Tamil)