மத்திய பிரதேச முன்னாள் முதல்வர் சிவ்ராஜ் சிங் சவுகான், அசாம் முன்னாள் முதல்வர் சர்பானந்த சோனவால், கர்நாடகா முன்னாள் முதல்வர் குமாரசாமி, பீஹார் முன்னாள் முதல்வர் ஜிதன்ராம் மஞ்சி, ஹரியானா முன்னாள் முதல்வர் மனோகர் லால் கட்டார், உ.பி., முன்னாள் முதல்வர் ராஜ்நாத் சிங் மற்றும் குஜராத் முதல்வராக இருந்த மோடியுடன் சேர்ந்து ஏழு முன்னாள் முதல்வர்கள் நேற்று மத்திய அமைச்சர்களாக பதவியேற்றனர்.

ஆந்திராவின் தெலுங்கு தேசம் கட்சியைச் சேர்ந்த ஸ்ரீகாகுளம் தொகுதியைச் சேர்ந்த ராம் மோகன் நாயுடு, இந்த அமைச்சரவையின் இளம் அமைச்சர் என்ற பெருமையை பெறுகிறார். இவருக்கு, 36 வயதாகிறது. தொடர்ந்து மூன்றாவது முறையாக எம்.பி.,யாக தேர்வு செய்யப்பட்டுள்ளார். இவர், முன்னாள் மத்திய அமைச்சர் எர்ரன் நாயுடுவின் மகன்.

முக்கிய நிகழ்ச்சிகளுக்கு பிரதமர் மோடி அணிந்து வரும் ஆடைகளும், வண்ண தலைப்பாகைகளும் செய்திகளில் பிரதான இடம் பெறுவது வழக்கம். கடந்த 2014ல் முதல்முறையாக பிரதமராக பதவி ஏற்றபோது, 'லினன்' துணியில் நெய்யப்பட்ட, 'க்ரீம்' நிற குர்தா - பைஜாமாவின் மேல், தங்க நிற ஜாக்கெட் அணிந்து வந்தார். கடந்த 2019 பதவி ஏற்பின் போது, பழுப்பு நிற ஜாக்கெட் அணிந்து வந்தார். நேற்று நடந்த பதவி ஏற்பு நிகழ்வுக்கு வந்த பிரதமர் மோடி, வெள்ளை நிற குர்தா - பைஜாமாவில், அடர் நீல நிற ஜாக்கெட்டும் கருப்பு நிற ஷூ அணிந்திருந்தார்.

பிரதமர் மோடியின் இரண்டாவது ஆட்சி காலத்தில், உ.பி.,யின் அமேதி தொகுதியில் ராகுலை தோற்கடித்த ஸ்மிருதி இரானி, பெண்கள் மற்றும் குழந்தைகள் மேம்பாட்டுத்துறை அமைச்சராக நியமிக்கப் பட்டார். ஹிமாச்சல பிரதேசத்தின் ஹாமிர்புர் தொகுதியில் வென்ற அனுராக் தாக்குர், மத்திய தகவல் ஒலிபரப்புத்துறை அமைச்சரானார். மஹாராஷ்டிராவின் ரத்னகிரி - சிந்துதுர்க் தொகுதியில் வென்ற பா.ஜ.,வின் நாராயண் ரானே, குறு, சிறு மற்றும் நடுத்தர தொழில்துறை அமைச்சரானார். இந்த முறை, ஸ்மிருதி இரானியை தவிர மற்ற இருவரும் வெற்றி பெற்றனர். இவர்கள் மூவருக்கும் மீண்டும் அமைச்சர் பதவி வழங்கப்படும் என எதிர்பார்க்கப்பட்ட நிலையில், மோடி 3.0 அரசில் இவர்களுக்கு இடமளிக்கப்படவில்லை. வெளியுறவுத் துறை இணை அமைச்சராக இருந்த பா.ஜ.,வின் மீனாட்சி லேகி மற்றும் சமூக நீதித்துறை இணையமைச்சர் பிரதிமா பவுமிக் ஆகியோருக்கும் இம்முறை வாய்ப்பு வழங்கப்படவில்லை. மேலும், திருவனந்தபுரத்தில் காங்., வேட்பாளர் சசி தரூரிடம் தோல்வி அடைந்த முன்னாள் அமைச்சர் ராஜீவ் சந்திரசேகருக்கும் இம்முறை அமைச்சரவையில் இடமில்லை. பார்தி பவார், நிரஞ்சன் ஜ்யோதி, தர்ஷனா ஆகியோருக்கும் வாய்ப்பளிக்கபடவில்லை.

நாட்டின் பிரதமராக தொடர்ந்து மூன்றாவது முறையாக நரேந்திர மோடி நேற்று பதவியேற்றார். அவருடன், 71 பேர் அடங்கிய அமைச்சரவையும் பதவியேற்றது. இந்த பதவியேற்பு விழாவில், திருநங்கையர், துாய்மைப் பணியாளர்கள், புதிய பார்லி., கட்டடத் தொழிலாளர்கள் உள்ளிட்டோர் பங்கேற்றனர். பதவியேற்பு விழாவில், திருநங்கையர் பங்கேற்பது இதுவே முதன்முறை.

அமைச்சர்களாக பொறுப்பேற்றவர்களில் 33 பேர் மத்திய அமைச்சரவைக்கு புதுமுகங்கள். பா.ஜ.,வில் இருந்து ஹரியானா முன்னாள் முதல்வர் மனோகர் லால் கட்டார், ம.பி., முன்னாள் முதல்வர் சிவ்ராஜ் சிங் சவுஹான், பா.ஜ., பொதுச் செயலர் பண்டி சஞ்சய் குமார், நடிகர் சுரேஷ் கோபி, மேற்கு வங்கத்தை சேர்ந்த சுகந்தா மஜூம்தார், மஹாராஷ்டிராவின் ரக் ஷா கட்சே, பஞ்சாபின் ரவ்நீத் சிங் பிட்டு, உத்தரகண்டை சேர்ந்த அஜய் டம்டா, உ.பி.,யின் ஜிதின் பிரசாதா, டில்லியின் ஹர்ஷ் மல்ஹோத்ரா, ஜார்க்கண்டின் அன்னபூர்ணா தேவி ஆகியோர் புதுமுகங்கள். கூட்டணி கட்சிகளில், மதச்சார்பற்ற ஜனதா தளத்தை சேர்ந்த குமாரசாமி, உ.பி.,யின் ராஷ்ட்ரீய லோக் தளத்தின் ஜெயந்த் சவுத்ரி, ஐக்கிய ஜனதா தளத்தின் லாலன் சிங், பீஹார் முன்னாள் முதல்வரும், ஹிந்துஸ்தான் அவாம் மோர்ச்சாவின் ஜிதன் ராம் மஞ்சி, தெலுங்கு தேசத்தின் ராம் மோகன் நாயுடு, லோக் ஜனசக்தியின் சிராக் பஸ்வான் உட்பட ஏழு பேர் முதல் முறையாக அமைச்சராகி உள்ளனர்.

'மோடி 3.0' அமைச்சரவையில் 71 பேர் பொறுப்பேற்றுள்ளனர். இதில், 11 பேர் தேசிய ஜனநாயகக் கூட்டணியில் அங்கம் வகிக்கும் தெலுங்கு தேசம், ஐக்கிய ஜனதா தளம், சிவசேனா உள்ளிட்ட கட்சிகளைச் சேர்ந்தவர்கள். மொத்தம் 30 பேர் கேபினட் அமைச்சர்களாகவும், ஐந்து பேர் தனிப்பொறுப்புடன் கூடிய இணை அமைச்சர்களாகவும், 36 பேர் இணை அமைச்சர்களாகவும் பொறுப்பேற்றனர். 24 மாநிலங்களுக்கு அமைச்சரவையில் பிரதிநிதித்துவம் அளிக்கப்பட்டு உள்ளது. இதர பிற்படுத்தப்பட்ட பிரிவில் 27, எஸ்.சி., 10, எஸ்.டி., ஐந்து, சிறுபான்மையினர் ஐந்து பேருக்கு பிரதிநிதித்துவம் அளிக்கப்பட்டுள்ளது. 18 மூத்த அமைச்சர்கள் மீண்டும் இடம் பெற்றுள்ளனர்.