காய்தல் உவத்தல் இன்றி கருத்து சொல்லுங்கள்

தி.மு.க., தலைவர் ஸ்டாலின் தலைமையில், ஒரே எண்ண ஓட்டம் உடைய கட்சிகள் மக்களை சந்தித்து, அவர்களின் மனதில் நிலையான எண்ணத்தை பெற்று இருக்கும் காலச்சூழலில், மாற்று கட்சிகளின், ஒரு சில கேள்விகளுக்கு விளக்கம் தர விழைகின்றேன். இரண்டு செய்திகள் குறித்த சில விரிவான பதிவுகள்:

ஹிந்து எதிரியா தி.மு.க.,?



தி.மு.க., எந்த மதத்துக்கும், எதிரான இயக்கம் அல்ல. மாறாக, அனைத்து மதத்தினரும், சகோதர பாசத்தோடு, தமிழகத்தில் பயணிக்க வேண்டும் என, உறுதியாக நம்புகிற இயக்கம். ஒரு சிலரின் விமர்சனங்கள், எங்களை யாரிடம் இருந்தும் பிரிக்க இயலாது. தமிழக மக்கள் சீரெடை போட, தி.மு.க., முன் வைக்கும் நியாயங்கள் இதோ.

கடந்த, 1967ல் தி.மு.க., ஆட்சிக்கு வரும் முன்னரே, 'தி.மு.க., ஆட்சிக்கு வந்தால் தேர் ஓடாது, தெப்பம் மிதக்காது, பூஜைகள் நடக்காது' என்ற, விமர்சனம் இருந்தது. ஆனால், 1968ல், அமைச்சராக இருந்த கருணாநிதி, கும்பகோணம் மகாமக விழாவின் போது, அங்கேயே தங்கி, பக்தர்களுக்கும், மகாமக விழாவிற்கும், முழு பாதுகாப்பும், சிறப்பு ஏற்பாடுகளும் செய்து, விழா முடியும் வரை, அங்கேயே இருந்து பெருமை சேர்த்தார். பின், 1967 - 75 காலகட்டத்தில், தி.மு.க., ஆட்சியின் போது, 65 ஆயிரம் ஏக்கர் நிலங்கள் மீட்கப்பட்டன. கோவில்களில் ஏழைகளுக்கு, திருமண மண்டபங்கள், கருணை இல்லங்கள், நுால் நிலையங்கள் அமைத்து தந்தார், கருணாநிதி.

மயிலை கபாலீசுவரர் கோவில் கருணை இல்லம் திறப்பு விழாவில், கருணாநிதியை, திருமுருக கிருபானந்த வாரியார் நெஞ்சார பாராட்டினார். புட்டபர்த்தி சாய்பாபா, தி.மு.க., தலைவர் கருணாநிதியை, அவரின் இல்லத்திலேயே சந்தித்து உரையாடினார்.

கடந்த, 1991 - -1996 அ.தி.மு.க., ஆட்சியில், 828 கோவில்களுக்கு குடமுழுக்கு நடத்தப்பட்டது. தி.மு.க., வின், 1996- - 2001 ஆட்சியில் 2,459 கோவில்களுக்கு குடமுழுக்கு செய்ய, அர்ச்சகர்கள், பூசாரிகள், பட்டாச்சாரியார்களுக்கு, ஓராண்டு காலம், புதிய தொழில் பயிற்சி வழங்கப்பட்டது.சைவ திருமறை ஆகம பயிற்சி மையங்கள், 20 மற்றும் வைணவ திவ்ய பிரபந்த பயிற்சி மையங்கள், 10 என, தி.மு.க., அரசால் உருவாக்கப்பட்டன.திருவாரூரில் ஓடாத தேரை, ஓட வைத்தவர் கருணாநிதி. தி.மு.க., ஆட்சியில், கோவில்களுக்கு, 20க்கும் மேற்பட்ட தங்க ரதங்கள், எண்ணற்ற வெள்ளி ரதங்கள் கோவில் உலாவுக்கு வழங்கப்பட்டன. சமயபுரம் மாரியம்மன் கோவிலில், மூலவர் விமானத்தை தங்க விமானமாக மாற்றிய பெருமையும், தி.மு.க., அரசுக்கு உண்டு.
நடைபெற இருக்கும், சட்டமன்ற தேர்தலுக்கு, தி.மு.க., தலைவர் ஸ்டாலின் அளித்திருக்கும் வாக்குறுதிகள்:
1.கோவில்களின் குடமுழுக்கு மற்றும் பராமரிப்புக்கு, 1,000 கோடி ரூபாய்.
2.ஆண்டுக்கு ஒரு லட்சம் பக்தர்கள், நாடு முழுவதும் உள்ள ஹிந்து கோவில்கள் சென்று வழிபாடு செய்ய, தலா, 25 ஆயிரம் ரூபாய்.
3.மசூதிகளுக்கும், தேவாலயங்களுக்கும், 200 கோடி ரூபாய்.
4.கோவில் பூசாரிகளுக்கு ஊதிய உயர்வு.
எந்த மதத்தினரையும், புண்படுத்த தி.மு.க., ஆட்சியில் கிஞ்சிற்றும் இடம் இருக்காது.

தாய்மொழி கல்வி



1.தாய்மொழியில் கற்றவர்களுக்கு, 1967- - 75ல் வேலைவாய்ப்பில், முன்னுரிமை அளிக்கப்பட்டது.
2.அண்ணா பல்கலையில், தி.மு.க., ஆட்சியில் தான், தமிழ் மொழி பொறியியல் பட்டப்படிப்புநடைமுறைக்கு வந்தது.
3.தமிழுக்கு செம்மொழி தகுதியை, மத்திய அரசிடம் பெற்று, செம்மொழி உயர் ஆராய்ச்சி நிறுவனத்தை உருவாக்கிய பெருமை தி.மு.க.,அரசையே சாரும்.
4.ஹிந்தி மொழியை, தி.மு.க., வெறுத்ததில்லை. ஆனால், கிராமத்து மாணவர்களுக்கு சுமையை அதிகரிக்க கூடாது என்ற நோக்கில், ஹிந்தி திணிப்பை எதிர்க்கிறது. இரு மொழி கொள்கையில் பயின்ற, தமிழக மாணவர்கள் வளர்ந்த நாடுகளில், முக்கிய பதவிகள் வகிக்கிறார்கள். அதற்கு அடிப்படை காரணம், தி.மு.க., வின் இரு மொழி கொள்கையே.
5.மத்திய அரசு, மத்திய பணியிடங்களுக்கான தேர்வுகளை ஆங்கிலத்திலும், ஹிந்தியிலும் மட்டுமே எழுத முடியும் என்று உத்தரவு பிறப்பித்தது. கழக தலைவர் ஸ்டாலின் எதிர்ப்புக்கு பிறகே, தமிழிலும் தேர்வு எழுதலாம் என்று, ஆணை பெறப்பட்டது.

முனைவர் இரா.தி.சபாபதி மோகன்,
முன்னாள் துணை வேந்தர். தி.மு.க., கொள்கை பரப்பு செயலர்



வாசகர் கருத்து

முதல் நபராக கருத்து தெரிவியுங்கள்!
Login via Dinamalar:
New to Dinamalar ?
(Press Ctrl+g to toggle between English and Tamil)