'100 நாட்களில் போதைப்பொருள் தடுப்பு பிரிவு அமைக்கப்படும்': கஞ்சா விற்பனையைத் தடுக்க அண்ணாமலை உறுதி

''கஞ்சா விற்பனையைத் தடுக்க மாநில அரசு தவறிவிட்டது. ஓட்டு எண்ணிக்கை முடிந்த 100 நாட்களுக்குள் கோவையில் மத்திய போதைப் பொருள் தடுப்பு பிரிவு அலுவலகம் அமைக்கப்படும்,'' என பா.ஜ., கோவை லோக்சபா வேட்பாளர் அண்ணாமலை வாக்குறுதி அளித்தார்.

நேற்று கோவையின் பல்வேறு பகுதிகளில், அண்ணாமலை பிரசாரம் செய்தார். அப்போது அவர் பேசியதாவது:

கடந்த, 2014ல் பா.ஜ., 283 தொகுதிகளில் தனிப்பெரும்பான்மையாக வென்றது. 2019ல், 303 எம்.பி.,க்களுடன் ஆட்சி அமைத்தது. தற்போது 400 எம்.பி.,க்களை கேட்கிறார் மோடி.

ராமர் கோவில், 370வது சட்டப்பிரிவு என முக்கிய முடிவுகளை நிறைவேற்றி விட்டோம். அடுத்து, நதி நீர் இணைப்பு, ஒரே நாடு ஒரே தேர்தல் போன்ற முக்கிய முடிவுகளை எடுக்க வேண்டும். இதற்காக 400 எம்.பி.,க்கள் பலம் தேவை.

தமிழகத்தில் நதிநீர் மேலாண்மை சரியில்லை. சிறுவாணியில் கேரள அரசு அணை கட்ட முடிவு செய்துள்ளது. தி.மு.க., அரசு வேடிக்கை பார்க்கிறது.

மாணவர்களிடமும் இளைஞர்களிடமும், கஞ்சா பழக்கம் அதிகரித்துள்ளது. மாநில அரசு இதைக் கட்டுப்படுத்தாது. எனவே, மத்திய போதைப் பொருள் தடுப்புப் பிரிவு அலுவலகம், ஓட்டு எண்ணிக்கை முடிந்த 100வது நாளில், இங்கு அமைக்கப்படும்.

என்.டி.பி.எஸ்., எனப்படும், போதைப் பொருள் தடுப்புச் சட்டம், 1985ன் கீழ் மரண தண்டனை விதிக்க முடியும். தமிழகத்தில் கஞ்சாவைக் கட்டுப்படுத்த, இதுபோன்ற கடுமையான அமைப்புகள்தான் தேவை.

இவ்வாறு, அண்ணாமலை பேசினார்.