நடிகர் விஜய் ஆதரவு யாருக்கு : பழனிசாமி, சீமான் தீவிர முயற்சி

நடிகர் விஜய் துவங்கியுள்ள தமிழக வெற்றிக்கழகத்தின் மறைமுக ஆதரவை பெறுவதற்கான தீவிர முயற்சியில் பழனிசாமி மற்றும் சீமான் இறங்கிஉள்ளனர்.

நடிகர் விஜய், தமிழக வெற்றிக் கழகம் என்ற பெயரில் அரசியல் கட்சியை துவங்கியுள்ளார். இந்த கட்சியை, தேர்தல் கமிஷனில் பதிவு செய்வதற்கான விண்ணப்பம் வழங்கப்பட்டு உள்ளது. ஆனால், இதுவரை கட்சி பதிவு செய்யப்படவில்லை.

வரும் 2026 சட்டசபை தேர்தலில் போட்டியிட முடிவு செய்து, தற்போது, தமிழக வெற்றிக் கழகம் ஒதுங்கி நிற்கிறது. கட்சிக்கு 2 கோடி உறுப்பினர்கள் சேர்ப்பதற்கான பணிகளில் கவனம் செலுத்த வேண்டும் என, மாவட்ட நிர்வாகிகளுக்கு விஜய் உத்தரவிட்டுள்ளார். உறுப்பினர் சேர்க்கை பணி ஆன்லைன் வாயிலாக நடந்து வருகிறது. இதுவரை 50 லட்சம் பேர் உறுப்பினராக சேர்ந்துள்ளதாக அக்கட்சி தலைமை கூறி வருகிறது. ஆனால், அதற்கான விபரங்கள்வெளியாகவில்லை.

இந்நிலையில், விஜய் ரசிகர்களின் ஓட்டுகளை பெறுவதற்கு, அ.தி.மு.க., பொதுச்செயலர் பழனிசாமி, நாம் தமிழர் கட்சி தலைமை ஒருங்கிணைப்பாளர் சீமான் ஆகியோர் விரும்புகின்றனர். இதற்காக, நடிகர் விஜயின் மறைமுக ஆதரவை பெறுவதற்கு, இருவரும் தீவிர முயற்சியில் இறங்கியுள்ளனர்.

தேர்தல் நெருங்கும்போது, யாருக்கு ஓட்டளிக்க வேண்டும் என்பதை மறைமுகமாக, ரசிகர்களுக்கு விஜய் வாயிலாக உணர்த்துவதற்கு இருவரும் முயற்சித்துவருவதாகக் கூறப்படுகிறது.