முதல்வர் செய்யாததை, எம்.பி.,க்கள் செய்வார்களா: அண்ணாமலை கேள்வி

''தி.மு.க.,வில் முதல்வர், அமைச்சர்கள், எம்.எல்.ஏ.,க்கள் செய்யாததை அவர்களின் எம்.பி.,க்கள் மட்டும் எப்படி செய்வார்கள்?'' என தமிழக பா.ஜ., தலைவர் அண்ணாமைலை கேள்வி எழுப்பினார்.

கோவையில் தேர்தல் பிரசாரத்தில் அண்ணாமலை பேசியதாவது:

மீண்டும் மூன்றாவது முறையாக பிரதமர் மோடி ஆட்சிக்கு வருவது உறுதி. உங்கள் வீட்டுப் பிள்ளையாக கோவை தொகுதியில் போட்டியிடுகிறேன். இங்கு நிலைவும் விசைத்தறி பிரச்னைக்கு அடுத்த ஒரு ஆண்டுக்குள் தீர்வு காணப்படும்.

மற்றவர்களைப் போல நான் பேச விரும்பவில்லை. விசைத்தறி நெசவாளர்களின் பிரச்னையைத் தீர்க்க சோமனுாரில் ஜவுளி பூங்காவை உருவாக்க வேண்டும். இதற்கு தீர்வைக் கொடுக்க வேண்டும் என்பதில் பா.ஜ., உறுதியாக உள்ளது.

மத்திய அரசு திட்டத்தின் வாயிலாக பிரதமர் மோடி வீடு தருகிறார். ஆனால், அதைக் கட்டுவதற்கு 3 சென்ட் நிலம் கூட இங்கு இல்லை. கோவையில் அடுக்குமாடி கட்டிடத்தை கட்டினால் நிலப் பிரச்சனைக்கு தீர்வு கிடைக்கும். இதை செயல்படுத்தும் திறன் பா.ஜ.,வுக்கு மட்டுமே உள்ளது.

தி.மு.க.,வில் முதல்வர், அமைச்சர்கள், எம்.எல்.ஏ.,க்கள் செய்யாததை அவர்களின் எம்.பி.,க்கள் மட்டும் எப்படி செய்வார்கள்?

இவ்வாறு அவர் பேசினார்.