பா.ஜ.,வை வீழ்த்துவதில் தான் ராகுலின் வெற்றி இருக்கிறது: ஸ்டாலின்
"மக்களை பிளவுப்படுத்தி பார்க்கும் பா.ஜ.,வை வீட்டுக்கு அனுப்ப வேண்டும்" என, முதல்வர் ஸ்டாலின் பேசினார்.
மும்பையில் ராகுல்காந்தி யாத்திரை நிறைவு விழா பொதுக்கூட்டம் நடந்தது. கூட்டத்தில் ஸ்டாலின் பேசியதாவது:
ராகுலின் இந்தப் பயணம் இந்தியாவுக்கான பயணம். இந்தியாவுக்கு இப்போது தேவை ஒற்றுமை மட்டும் தான். மக்களை பிளவுப்படுத்தி பார்க்கும் பா.ஜ.,வை வீட்டுக்கு அனுப்ப வேண்டும்.
தேர்தல் பத்திரங்கள் வாயிலாக பா.ஜ., மிகப் பெரிய ஊழலை செய்துள்ளது, தெரிய வந்துள்ளது. நாட்டின் ஒற்றுமையை சீர்குலைக்கும் பா.ஜ.,வை ஆட்சியில் இருந்து அகற்ற வேண்டிய காலம் இது.
கன்னியாகுமரியில் துவங்கிய ராகுலின் யாத்திரை டில்லியில் எதிரொலிக்க வேண்டும். இதற்கு மக்களின் துணை வேண்டும். பா.ஜ.,வை போல நாட்டுக்கு ஆபத்து வேறொன்றும் கிடையாது.
ஒன்றுமில்லாத காரணங்களை சொல்லி பா.ஜ., இந்த நடைபயணத்தை தடுக்க நினைத்தது. ஆனால், ராகுல் அதற்கெல்லாம் அஞ்சவில்லை. ராகுலின் நடைபயணத்தை கண்டு பா.ஜ.,வுக்கு தூக்கம் போய்விட்டது.
ராகுலின் இந்த பயணம் இந்தியாவுக்கானது. கடந்த 10 ஆண்டுகளில் பிரதமர் மோடி 2 விஷயங்களை மட்டுமே செய்திருக்கிறார். ஒன்று வெளிநாட்டு பயணம் மேற்கொள்வது, மற்றொன்று பொய்ப் பிரசாரம் செய்வது.
இண்டியா கூட்டணியை நாங்கள் உருவாக்கிய போது, இந்தியா என்று சொல்வதை பா.ஜ., நிறுத்திக் கொண்டது. இது அவர்களின் பயத்தைக் காட்டியது.
எங்கள் கூட்டணியை ஊழல் கூட்டணி என மோடி சொல்கிறார், ஆனால் தேர்தல் பத்திரங்கள் வாயிலாக பா.ஜ., ஊழல் செய்தது, வெளிவந்துள்ளது. இது தான் பா.ஜ.,வின் ஒயிட் காலர் ஊழல். இவர்கள் ஊழலை பற்றி பேசுகிறார்கள்.
மக்கள் எங்கள் மீது வைத்துள்ள நம்பிக்கைக்காக நாங்கள் அரசியலில் இருக்கிறோம். தேர்தல் தேதிகள் வெளியாகி உள்ளன. நமது ஒரே லட்சியம் பா.ஜ.,வை வீழ்த்துவது தான். பா.ஜ.,வை வீழ்த்துவதில் தான் ராகுலின் வெற்றி இருக்கிறது.
இவ்வாறு ஸ்டாலின் பேசினார்.
வாசகர் கருத்து (7)