ஓடாக தேயும் அரசு வாகனங்கள்

தேர்தல் நடத்தை விதிமுறைகள் காரணமாக மக்கள் பிரதிநிதிகளாக உள்ள அமைச்சர்கள், உள்ளாட்சி பிரதிநிதிகளின் அரசு வாகனங்கள் திரும்ப ஒப்படைக்கப்பட்டன.

ஆனால் திருப்பூர் மாவட்டத்தில் விதிமுறைகளை மீறி, அரசு வாகனங்கள் பயன்படுத்தப்படுவதாக குற்றச்சாட்டு எழுந்துள்ளது.

திருப்பூர் மாவட்டத்தில், 13 ஊராட்சி ஒன்றிய குழு தலைவர்களுக்கு சமீபத்தில் 'ஏசி' வசதி கொண்ட 'ஸ்கார்பியோ' கார்கள் வழங்கப்பட்டன. இவை அனைத்தும் தற்போது தேர்தல் பணிக்கும் அதிகாரிகளின் தனி வேலைகளுக்கும் பயன்படுத்தப்பட்டு வருகின்றன. இந்த வாகனங்களின் டிரைவர்களுக்கு சம்பளத்துடன் ஓய்வு தரப்பட்டுள்ளது.

வருவாய் துறையின் டிரைவர்கள், டிரைவிங் லைசென்ஸ் வைத்துள்ள கடைநிலை ஊழியர்களால், இவ்வாகனங்கள் இயக்கப்படுகின்றன. இவற்றில் ஜி.பி.எஸ்., கருவி பொருத்தப்படவில்லை. 'லாக்புக்' நடைமுறையும் பின்பற்றப்படுவதில்லை.

தற்போது, திருப்பூர் லோக்சபா தொகுதிக்கான தேர்தல் பார்வையாளராக, ராஜஸ்தான் மாநிலத்தைச் சேர்ந்த ஐ.ஏ.எஸ்., அதிகாரி ஹிமான்சு குப்தா நியமிக்கப்பட்டுள்ளார். மூன்று நாட்களுக்கு முன்பு, தேர்தல் பார்வையாளரின் குடும்பத்தினர், விமானம் மூலம் கோவை வந்தனர். அவர்கள், கலெக்டர் அலுவலகம் அருகே உள்ள மாவட்ட விருந்தினர் மாளிகையில் தங்க வைக்கப்பட்டுள்ளனர்.

நேற்று முன்தினம் காலை, தேர்தல் பார்வையாளர் ஹிமான்சு குப்தா, தன் குடும்பத்தினருடன், தேர்தல் பணிக்காக வழங்கப்பட்டுள்ள சைரன் பொருத்திய, 'இனோவா' காரில்சுற்றுலா புறப்பட்டு சென்றார். மற்றொரு அரசு வாகனத்தில், உதவியாளர், போலீசாரும் சென்றனர்.

தேர்தல் பார்வையாளர் மற்றும் குடும்பத்தினர், பழனி மற்றும் கொடைக்கானலுக்கு சுற்றுலா சென்றதாக கூறப்படுகிறது. விரைவில் ஊட்டிக்கு சுற்றுலா செல்ல திட்டமிட்டுள்ளதாகவும் கூறப்படுகிறது.

இதுகுறித்து விளக்கம் கேட்பதற்காக தேர்தல் பார்வையாளர், ஹிமான்சு குப்தாவின் மொபைல் எண்ணுக்கு தொடர்பு கொண்டபோது, அணைத்து வைக்கப்பட்டிருந்தது.

விதிமீறல்களை கண்டறிந்து தடுத்து, அமைதியான முறையில் தேர்தல் நடைபெறுவதை உறுதி செய்வதற்காக நியமிக்கப்பட்ட தேர்தல் பார்வையாளர், விதிகளை மீறி அரசு வாகனத்தில் குடும்பத்துடன் சுற்றுலா சென்றதற்காக செலவினங்களும் ஒட்டுமொத்த தேர்தல் செலவில்தான் சேர்க்கப்படுமா என, வாக்காளர்கள் கேள்வி எழுப்புகின்றனர்.