நிறைவேறாத கோரிக்கை குறையாத கொதிநிலை !

எடப்பாடி பழனிசாமி முதல்வராக இருந்தபோது, தி.மு.க., தன் 'போராளி' அமைப்புகள் வாயிலாக ஏகப்பட்ட போராட்டங்களை தூண்டிவிட்டது. அவர்களில், டாஸ்மாக் போராட்ட பிரபல கோவன் போன்றோர் தி.மு.க., ஆட்சி அமைந்த பின் காணாமல் போயினர். ஆனால் டாஸ்மாக் காணாமல் போகவில்லை.

அதே போல், அரசு ஊழியர்களை துாண்டிவிட்டும் போராட்டங்களை கிளறியது தி.மு.க., அதில், சில போராட்டங்களில், அப்போது எதிர்க்கட்சி தலைவராக இருந்த ஸ்டாலினே பங்கேற்று, தி.மு.க., ஆட்சி அமைந்ததும் கோரிக்கைகளை நிறைவேற்றுவதாக உத்தரவாதம் கொடுத்தார்.

தன், 2021 தேர்தல் பிரசாரத்திலும் அதையே சொன்னார். தி.மு.க., ஆட்சி அமைந்து மூன்றாண்டுகள் ஆகப்போகின்றன. டாஸ்மாக் போல அரசு ஊழியர்களின் பிரச்னைகளும் காணாமல் போகவில்லை. ஆனால், கோவன் காணாமல் போனது போல அரசு ஊழியர்கள் காணாமல் போகவில்லை.

இதுவரை எந்த அரசும் கண்டிராத எண்ணிக்கையில், அரசு மற்றும் பொது துறை ஊழியர்களின் போராட்டங்களை, கடந்த 2023ல் தி.மு.க., அரசு கண்டது.

கோரிக்கைகள் என்ன?

அரசு, பொது துறை மற்றும் கூட்டுறவு ஊழியர்களுக்கென பல்வேறு சங்கங்கள் உள்ளன. ஒவ்வொரு சங்கமும் வெவ்வேறு கோரிக்கைகளை முன்வைத்து போராடுகின்றன. ஆனால், அனைத்து சங்கங்களும் பொதுவாக கேட்கும் விஷயங்கள் இவை:

1. சரண் விடுப்பு ஒப்படைப்பை மீண்டும் அமல்படுத்த வேண்டும்

2. பழைய ஓய்வூதிய திட்டத்தை அமல்படுத்த வேண்டும்

3. சிறப்பு காலமுறை ஊதியம் பெறுபவர்களுக்கு வரையறுக்கப்பட்ட ஊதியம் வேண்டும்

4. பணி நிரந்தரம் வேண்டும்

5. காலி பணியிடங்கள் நிரப்பப்பட வேண்டும்.

இவற்றில், பழைய ஓய்வூதிய கோரிக்கையை தான் அரசு ஊழியர்கள் மிகவும் முக்கியமானதாக கருதுகின்றனர். 'தமிழகத்தின் நிதி நிலையை கருதினால், பழைய ஓய்வூதிய திட்டத்தை அமல்படுத்த முடியாது' என்று பழனிசாமி முதல்வராக இருக்கும்போது தெளிவாக விளக்கிவிட்டார். இருப்பினும், தி.மு.க., அரசு ஊழியர்களின் ஆசையை அந்த நேரத்தில் துாண்டிவிட்டது.

நீட் தேர்வு ஒழிப்புக்கு தங்களிடம் ரகசியம் இருப்பதால் தங்களால் இயலும் என்பது போல் அரசு ஊழியர்களுக்கு உத்தரவாதம் கொடுத்தது.

அரசு ஊழியர்கள் தவிர; போக்குவரத்து கழகம், டாஸ்மாக் என பொது துறை ஊழியர்களும் ரேஷன் ஊழியர்களும் தங்கள் கோரிக்கைகள் சார்ந்து இதே நிலையில் தான் உள்ளனர்.

தி.மு.க., விசுவாசிகள்

அரசு ஊழியர்கள் தி.மு.க., விசுவாசிகள் என்பதும் தி.மு.க., ஆட்சியில் அரசு ஊழியர் போராட்டங்கள் சுமுகமாக முடிக்கப்படும் என்பதும் அரசியல் ஆய்வாளர்கள் வழக்கமாக முன்வைக்கும் கருத்துகள்.

மாறாக, அ.தி.மு.க., ஆட்சியில் அரசு ஊழியர் போராட்டங்கள் நடந்தால் தடாலடியாக கையாளப்படுவது வழக்கம். பழனிசாமி ஆட்சி காலத்தில் நடந்த ஆசிரியர் போராட்டத்தின் போது, அவர், ஆசிரியர்களுக்கு எதிராக வீரியமாக பேசியது அனைவரும் அறிந்ததே.

முதல்வர் ஸ்டாலின் ஆட்சியில் மேற்கண்ட இரண்டுமே நடக்கவில்லை.

கடந்த 2021ல் தி.மு.க., ஆட்சி அமைத்தவுடன், தங்கள் கோரிக்கைகளோடு அரசை அணுகியபோது, 'இப்போது தான் ஆட்சி அமைந்துள்ளது, சற்று பொறுங்கள்' என்று சொல்லி அரசு ஊழியர்களை ஆட்சியாளர்கள் அனுப்பிவிட்டனர். சங்கங்கள், 'நம் அரசு தானே' என்று பொறுமை காத்தன. கடந்த 2022ல் அணுகியபோது, 'நிதி நிலை சரியில்லை சற்று பொறுங்கள்' என்று சொல்லி அனுப்பிவிட்டனர்.

மீண்டும், சங்கங்கள், 'நம் அரசு தானே' என்று பொறுமை காத்தன. ஆனால், 2023ல், ஆட்சியாளர்கள், எந்த நடவடிக்கையும் எடுக்க முனைப்பு காட்டவில்லை என்று தெரிந்ததும் தொடர் போராட்டங்கள் வெடித்தன. ஆனால், எந்த போராட்டத்துக்கும் ஆட்சியாளர்கள் மசியவில்லை.

அரசு ஊழியர் சங்கங்களில் பெரிய சங்கமான ஜாக்டோ- - ஜியோ மற்ற சங்கங்களோடு இணைந்து, கடந்த பிப்., 26 முதல் காலவரையற்ற வேலை நிறுத்த போராட்டம் நடக்கும் என அறிவித்தது. உடனடியாக, சங்க நிர்வாகிகளை அழைத்து அவசர அவசமாக, அமைச்சர்கள் எ.வ.வேலு, மகேஷ், முத்துசாமி ஆகியோர் பேசி சரிக்கட்டினர். முதல்வர் ஸ்டாலினையும் சந்திக்க வைத்தனர்.

'உங்களுக்கு நான் செய்யாமல் வேறு யார் செய்வார்' என ஸ்டாலின் சொன்னதை கேட்டு கூலான சங்க நிர்வாகிகள் போராட்டத்தை கைவிட்டனர். சங்கத்தினர் முடிவை, அரசு ஊழியர்கள், ஆசிரியர்கள் ஏற்கவில்லை. தேர்தல் நெருங்கும் நேரம்; இது தான் சரியான தருணம் என்றெல்லாம் பேசி புரிய வைக்கப் பார்த்தனர்.

பட்ஜெட்டில் அறிவிப்புகள் வரும் என சொல்லி, அவர்களை சரிக்கட்டிய நிர்வாகிகளுக்கு, 2024 - 25ம் ஆண்டு பட்ஜெட் மிகப்பெரிய ஏமாற்றத்தை தந்தது. இப்போது ஒட்டுமொத்த அரசு, பொது துறை மற்றும் ரேஷன் ஊழியர்கள் அரசு மீது கடும் கோபத்தில் உள்ளனர்.

முதல்வர் ஸ்டாலின் ஆட்சியில் சுமுகமான தீர்வும் இல்லை, தடாலடியான எதிர்ப்பும் இல்லை. போராட்டங்களின் போது வாக்குறுதிகளை அரசு கொடுக்கிறது. பின், கிடப்பில் போடுகிறது. 'நம்ப வைத்து கழுத்தறுக்கிறார்கள்' என்பதே அரசு ஊழியர் எண்ணத்தின் சாராம்சமாக இருக்கிறது.

எத்தனை ஓட்டு?

ஏறத்தாழ 11 லட்சம் அரசு ஊழியர்கள் பணியில் இருக்கின்றனர். தவிர, ஏழு லட்சம் பேர் ஓய்வூதியர்கள். போக்குவரத்து கழகங்களில் 1.40 லட்சம் ஊழியர்கள் தவிர 92 ஆயிரம் ஓய்வூதியர்கள். இவர்கள் தவிர ரேஷன் ஊழியர்கள் 25 ஆயிரம் பேர் மற்றும் டாஸ்மாக் ஊழியர்கள் 24,300 பேர். ஆக, ஏறத்தாழ 21 லட்சம் பேர், தங்கள் சம்பளத்திற்கும் ஓய்வூதியத்திற்கும் அரசை நம்பி இருக்கிறார்கள். அவர்கள் கணக்குப்படி, குடும்பத்தோடு சேர்த்து கணக்கிட்டால், கிட்டத்தட்ட ஒரு கோடி வாக்குகள் அவர்கள் கையில் இருக்கிறது.

என்னதான் அதிருப்தி இருந்தாலும் அரசு ஊழியர்கள் தி.மு.க.,விற்கு எதிராக வாக்களிப்பது அரிது. அதனால் தான் ஒரு சில சங்கங்கள் தாங்கள் எதிர்கட்சிக்கு வாக்களிக்காமல் 'நோட்டா'வுக்கு வாக்களிக்கப் போவதாக அறிவித்து உள்ளனர். ஆனால், இந்த முறை, இந்த மாபெரும் ஓட்டு வங்கியில் கணிசமான பகுதி அரசுக்கு எதிராக மாறுவதற்கான வாய்ப்பு இருப்பதாக சங்கத்தினர் தெரிவிக்கின்றனர். தி.மு.க., எப்படி எதிர்கொள்ளப்போகிறது?