முஸ்லிம் இயக்கங்கள் பிரிந்துள்ளதால் திமுக-காங்., கூட்டணிக்கு பாதிப்பா?

சமூக நல்லிணக்கத்தை வலியுறுத்துவதில் முன்னோடி; இஸ்லாமிய அறிஞர்; பேராசிரியர்; மனித நேய மக்கள் கட்சி தலைவர் என, பன்முகத்தன்மை உடையவர் ஜவாஹிருல்லா. அரசியல் களத்தில் புகுந்து, ராமநாதபுரம் தொகுதி எம்.எல்.ஏ.,வாக பணியாற்றிய இவர், தி.மு.க.,கூட்டணியில், இந்த முறை பாபநாசம் தொகுதியில் களம் காண்கிறார்.

நம் நாளிதழின், தேர்தல் களத்திற்கு அவர் அளித்த சிறப்பு பேட்டி:



தி.மு.க., கூட்டணியில் இடம் பெற்றிருக்க வேண்டிய மஜ்லிஸ் கட்சி, அ.ம.மு.க., கூட்டணியில் இடம் பெற்றதற்கு, நீங்கள் காரணமா?



தி.மு.க., தலைவருக்கு, யாரை கூட்டணியில் சேர்த்தால் பலம்; யாரை சேர்த்தால் பலவீனம் என்பது, நன்றாகவே தெரியும். எனவே, நாங்கள் காரணம் அல்ல.

தி.மு.க., கூட்டணியில், உங்கள் கட்சிக்கு, இரு சீட்டுகள் மட்டுமே ஒதுக்கப்பட்டதால், அதிருப்தியா?



தொடக்கத்தில், எல்லா கூட்டணி கட்சிகளிலும், அத்தகைய சிந்தனை இருந்தது. தற்போது, 234 தொகுதிகளிலும், தி.மு.க., கூட்டணி வேட்பாளர்கள் வெற்றி பெற, அனைவரும் பணியாற்றி வருகின்றனர்.

ராமநாதபுரம் தொகுதியில் ஏற்கனவே போட்டியிட்டு தோல்வியை தழுவியதால், இம்முறை பாபநாசம் பக்கம் போனீர்களா?



குறிப்பிட்ட காரணம் எதுவும் இல்லை. கூட்டணி கட்சிகளுக்கு, தொகுதி ஒதுக்குவதில், பல்வேறு பிரச்னைகள் இருந்தன. தன் கட்சியினரையும், கூட்டணி கட்சியினரையும் திருப்திப்படுத்த வேண்டிய நிலைமை, தி.மு.க.,வுக்கு இருந்தது. இந்நிலையில், எங்களுக்கு பாபநாசம் தொகுதியை ஒதுக்கினர்; அதை ஏற்றுக் கொண்டோம்.

உங்கள் கட்சியினர் உதயசூரியன் சின்னத்தில் தான் போட்டியிட வேண்டும் என, தி.மு.க., தலைமை நெருக்கடி கொடுத்ததா?



எந்தவிதமான நெருக்கடியும் கொடுக்கவில்லை. தேர்தல் திடீரென அறிவிக்கப்பட்டு விட்டது. குறுகிய காலத்தில், மக்களிடம் எங்களின் சின்னத்தை கொண்டு சேர்க்க முடியாது என்பதால், உதயசூரியன் சின்னத்தில் போட்டியிடுகிறோம்.

மனித நேய மக்கள் கட்சியில் இருந்து, தலைவர்கள் எல்லாம் பிரிந்து போய் விட்ட சூழலில், கட்சிக்கு பலம் எதுவும் கிடையாது என, தொகுதி பங்கீட்டின் போது விமர்சிக்கப்பட்டதாமே?



இது, தவறான தகவல். மனிதநேய கட்சி மிகவும் வலுவாக உள்ளது. தேர்தல் அறிவிப்புக்கு முன், தமிழகம் முழுதும், ஏழு மண்டலங்களாக பிரித்து, ஆயிரக்கணக்கான கட்சி தொண்டர்களை, தேர்தல் முன்னேற்பாடு பணிகளில் ஈடுபடுத்தினோம். அனைத்து மாவட்டங்களிலும், மிக வலுவாக செயல்பட்டுள்ளோம். முன்பை விட அதிக பலத்துடன் இயங்குகிறோம்.

'உருது பேசும் இஸ்லாமியர்களின் ஓட்டை, மஜ்லிஸ் கட்சி வழியாக, அ.ம.மு.க., கூட்டணி பெறும்' என, அக்கட்சியினர் நம்புகின்றனரே?



தமிழக முஸ்லிம்கள், மொழி வாரியான பிரிவினையை பார்ப்பதில்லை. மறைந்த தலைவர் அப்துல்சமதுவின் தாய்மொழி தமிழ். அவர், வேலுார் எம்.பி.,யாக தேர்வு செய்யப்பட்டார். உருது பேசும் அப்துல் லத்தீப் ஆதரவாளர்கள், தமிழ் பேசும் முஸ்லிம்களாக இருந்தனர். தமிழகத்தில் தமிழ் பேசும் முஸ்லிம், உருது பேசும் முஸ்லிம் என்ற, பாகுபாடு கிடையாது. அவர்களால், 1 சதவீதம் ஓட்டை கூட பிரிக்க முடியாது.

உங்களால் தான், எஸ்.டி.பி.ஐ., கட்சியும், தி.மு.க., கூட்டணியில் இடம் பெற முடியாமல் போனதாமே?



இதுவும், தவறான குற்றச்சாட்டு. கூட்டணிக்கு நாங்கள் தலைமை தாங்கவில்லை. கூட்டணி தலைவர் ஸ்டாலின். அவர், இந்த கூட்டணியில் யார் இருந்தால் பலம் என்பதை அறிந்துள்ளார். அந்த அடிப்படையில், சில கட்சியினரை சேர்த்துள்ளார்; சிலரை சேர்க்கவில்லை. அதற்கு நாங்கள் பொறுப்பல்ல.

முஸ்லிம் இயக்கங்கள் பிரிந்து போட்டியிடுவதால், தி.மு.க., -- காங்., கூட்டணிக்கு, முஸ்லிம் ஓட்டுக்கள் முழுமையாக கிடைக்காது என்கின்றனரே?



பெரும்பாலான முஸ்லிம் அமைப்புகளும், சமூக அமைப்புகளும், தி.மு.க., - காங்., கூட்டணிக்கு பின்புலமாக இருக்கின்றன. எந்தவிதமான பிரிவினையும் இல்லை. ஒட்டுமொத்தமாக தி.மு.க., கூட்டணியின் பின்னால், தமிழக முஸ்லிம்கள் ஒருங்கிணைந்துள்ளனர்.

நாங்கள் பா.ஜ.,வோடு கூட்டணி வைத்திருந்தாலும், இஸ்லாமியர்கள்-, கிறிஸ்தவர்களுக்கு எதிர்ப்பாக செயல்பட்டதில்லை என, பிரசாரம் செய்கிறாரே முதல்வர் இ.பி.எஸ்.,?



அவர் பிரசாரத்தில், கொள்கை வேறு; கூட்டணி வேறு என்று பேசுகிறார். எந்த கொள்கை அடிப்படையில், குடியுரிமை திருத்த சட்டத்திற்கு ஆதரவாக, அ.தி.மு.க., - எம்.பி.,க்கள் ஓட்டளித்தனர். அவர்கள் ஆதரிக்காவிட்டால், அந்த சட்டம் நிறைவேறி இருக்காது. கடுமையான எதிர்ப்பு அலை, அ.தி.மு.க.,வுக்கு எதிராக உள்ளது. தமிழக மக்களின் உரிமைகளை இ.பி.எஸ்., காவு கொடுத்து விட்டார்.

'பா.ஜ.,வுடன் கூட்டணியில் இருந்ததால் தான், பார்லிமென்ட் தேர்தலில், வேலுார் தொகுதியில், அ.தி.மு.க., தோல்வியடைந்தது' என, அமைச்சர் நிலோபர் கபில் கூறியிருக்கிறாரே?



உண்மைதான். பா.ஜ.,வை முதுகில் சுமந்து வருவது, மிக முக்கிய காரணம். பா.ஜ., கட்டளைக்கேற்ப இங்கு ஆட்சி நிர்வாகம் நடக்கிறது. துாத்துக்குடி ஸ்டெர்லைட் துப்பாக்கி சூடு நடந்தபோது, தலைமை செயலகத்தில், முதல்வர் செய்தியாளர்களை சந்தித்தார். அப்போது, உங்களை போல் நானும், 'டிவி'யில் பார்த்தேன் என்றார். இதிலிருந்தே, யார் ஆட்சியை நடத்தியது என்பதை அறியலாம்.

குடியுரிமை திருத்த சட்டத்தை ஆதரித்து, பார்லிமென்டில் ஓட்டளித்த அ.தி.மு.க., இப்போது அதை நடைமுறைபடுத்தத் தேவையில்லை என, அழுத்தம் கொடுக்கப் போவதாக சொல்கிறதே?



சி.ஏ.ஏ., சட்டத்தை பலரும் எதிர்த்தனர். தமிழகத்தில் போராட்டம் நடந்தது. அப்போது, முதல்வரை நேரடியாக சந்தித்து, சட்டசபையில் எதிர்ப்பு தீர்மானம் நிறைவேற்றக் கோரினோம்.தலைமை செயலர் தலைமையில் நடந்த கூட்டத்தில், சட்டத்தின் கொடுமைகளை எடுத்துரைத்தோம். சட்டத்திற்கு எதிர்ப்பு தெரிவித்து, தீர்மானம் நிறைவேற்றக் கோரினோம். தமிழக சட்டசபையில், எதிர்க்கட்சிகள் இதே கோரிக்கையை வலியுறுத்தின. அப்போது, தீர்மானம் நிறைவேற்றாதவர்கள், தேர்தல் அறிக்கையில் கூறியிருப்பது பொய் என்பதை மக்கள் புரிந்து கொள்வர்.

வேலுார் இப்ராஹிம், பா.ஜ., மேடைகளில் தோன்றி பேசப் போனால், அவரை ஆங்காங்கே இருக்கும் முஸ்லிம் இயக்கங்கள் பேச விடாமல் தடுக்கிறதே?



தடுப்பது ஜனநாயகத்துக்கு விரோதமான செயல். ஜனநாயக நாட்டில், விதிமுறைகளுக்கு உட்பட்டு கருத்து கூறுவதை தடுக்கக் கூடாது. வரம்பு மீறி பேசினால், உரிய நடவடிக்கையை எடுக்க வேண்டும்.

ஒரே கூட்டணியில் இருக்கும், மனித நேய மக்கள் கட்சி மற்றும் இந்திய யூனியன் முஸ்லிம் லீக் கட்சிகளுக்குள் ஒற்றுமை இருக்கிறதா?



ஒருங்கிணைந்து செயல்படுகிறோம். ஒட்டு மொத்தமாக கூட்டணியில் உள்ள, அனைத்து கட்சிகளும் ஒற்றுமையாக இணைந்து செயல்படுகிறோம். நாங்கள் அனைவருக்காகவும் பாடுபடும் கட்சிகள்.

எல்லா சிறு இயக்கங்களும், தேர்தல் அறிக்கையை தனியாக வெளியிட்டிருக்கின்றன. அப்படிப்பட்ட முயற்சி எதுவும் எடுக்கவில்லையா?



நாங்கள் இரண்டு தொகுதிகளில் போட்டியிடுகிறோம். அந்த தொகுதிகளுக்கு, தேர்தல் அறிக்கையை வெளியிட்டுள்ளோம்.

கோவில் நிலங்களை அரசு கையகப்படுத்தி, ஏழை விவசாயிகளுக்கு பங்கிட்டு கொடுக்க வேண்டும். அதற்காக இந்திய அறக்கட்டளைகள் சட்டமும், தமிழ்நாடு ஹிந்து அறநிலையத் துறை சட்டமும் திருத்தப்பட வேண்டும் என, திருமாவளவன் கூறியிருக்கிறாரே?



அந்த சட்டமே தவறு என்பது என் கருத்து. எந்த வழிபாட்டு தலமாக இருந்தாலும், அதற்கு தான தர்மம் வழங்கி இருப்பர். அவர்களின் நோக்கம், அந்த வழிபாட்டு தலம் சிறப்பாக இருக்க வேண்டும் என்பதாகும். அந்த நோக்கத்திற்கு மாறாக செயல்படக் கூடாது.

எல்லா மதங்களையும் சேர்ந்த வழிபாட்டு தலங்களுக்கு சொந்தமான நிலங்களை, அரசு கையகப்படுத்தி, அந்த திட்டத்தை வெற்றிகரமாக செயல்படுத்தலாம் என, மார்க்சிஸ்ட் கம்யூனிஸ்ட் மாநில செயலர் பாலகிருஷ்ணன் கூறியிருக்கிறாரே?



அது அவர் கருத்து; நான் என் கருத்தை கூறிவிட்டேன்.இவ்வாறு, அவர் கூறினார்.



வாசகர் கருத்து

முதல் நபராக கருத்து தெரிவியுங்கள்!
Login via Dinamalar:
New to Dinamalar ?
(Press Ctrl+g to toggle between English and Tamil)