துண்டுக்கு காரணம்

துண்டுக்கு காரணம்! 1. எதையும் ஜோதிடர் அறிவுரைப்படியே செய்யும் இலை கட்சி தலைவர், சமீபத்தில் ஜோதிடரை அழைத்து, 'தேர்தல் வெற்றிக்கு என்ன செய்ய வேண்டும்?' என கேட்டாராம். நிறைய விஷயங்களை சொன்ன ஜோதிடர், 'தேர்தல் பிரசாரத்தின் போது, கட்டாயம் துண்டு போட்டுக்கொண்டு தான் பிரசாரம் செய்யணும். அந்த துண்டில் சிகப்பு, கருப்பு, வெள்ளை நிறங்கள் பொடி கட்டங்களாக இருக்க வேண்டும்' என சொல்லி வைக்க, அதன்படியே பிரசாரம் செய்கிறாராம் தலைவர்.

குடும்ப சகிதமாக... 2. விவசாயியின் ஏர் கலப்பையோடு வேட்புமனு தாக்கல் செய்யப் போனாராம் உரக்க முழங்கும் மான் தலைவர். கூடவே மனைவி, அம்மா ஆகியோரையும் வலுக்கட்டாயமாக வேட்புமனு தாக்கல் செய்யும் அலுவலகத்துக்கு அழைத்துச் சென்று, அங்கு, தன் தாயிடன் காலில் விழுந்து ஆசி வாங்கிவிட்டு, மனைவியோடு சேர்ந்து வேட்புமனு தாக்கல் செய்திருக்கிறார். தான் குடும்பத்தோடுதான் இருக்கிறேன் என்பதை வெளியுலகுக்கு காட்டவே மான் தலைவர் அப்படி செய்தாராம்.

ஆடியோ அதிர்ச்சி! 3. முன்னாள் மத்திய அமைச்சராகவும், சூரிய கட்சியின் மிக முக்கியமான பொறுப்பிலும் இருக்கும் அந்த தலித் தலைவர், அமைச்சராக இருந்தபோது செய்த ஊழல் பிரச்னைக்குப் பின், ஜெயிலில் இருந்து தப்பி வந்ததும், கட்சி தலைவரின் சகோதரரை சந்தித்துப் பேசினாராம். அப்போது, தலைவர் குறித்தும் குடும்பம் குறித்தும் தாறுமாறாக விமர்சித்தாராம். அதுதொடர்பான ஆடியோ, எதிர்க்கட்சியினரிடம் சிக்கி இருக்கிறதாம். தேர்தல் நெருக்கத்தில் ஆடியோ வெளியாகும் என்கின்றனர்.