விருத்தாசலமா; விருகம்பாக்கமா? குழப்பத்தில் தே.மு.தி.க., பிரேமலதா

- நமது நிருபர் -
சட்டசபை தேர்தலில் களமறிங்க விரும்பும் தே.மு.தி.க., பொதுச்செயலர் பிரேமலதா, தி.மு.க., கூட்டணியில், விருகம்பாக்கம், விருத்தாசலம் ஆகிய இரண்டில் எந்த தொகுதியில் நிற்பது என்ற குழப்பத்தில் இருக்கிறார்.

தி.மு.க., கூட்டணியில், இரட்டை இலக்க தொகுதிகளை, தே.மு.தி.க., எதிர்பார்க்கிறது. அதில் குறிப்பாக, விருகம்பாக்கம் தொகுதி கேட்கப்பட்டுள்ளது. மறைந்த தே.மு.தி.க., தலைவர் விஜயகாந்த் வீடு, இந்த தொகுதியில் சாலிகிராமத்தில் உள்ளது. விஜயகாந்த்திடம் உதவி பெற்ற திரைப்பட ஊழியர்கள் அதிகமாக வசிப்பதால், அவர்களின் ஓட்டுக்கள் தே.மு.தி.க.,வுக்கு உறுதுணையாக இருக்கும் என, கருதப்படுகிறது.

இந்த தொகுதியில் ஏற்கனவே, அ.தி.மு.க., கூட்டணியில் இருந்தபோது, தே.மு.தி.க., சார்பில் பார்த்தசாரதி வெற்றி பெற்றுள்ளார். எனவே, அந்த தொகுதியை தர வேண்டும் என, தே.மு.தி.க., கேட்டு வருகிறது. அத்தொகுதியில் பார்த்தசாரதி மீண்டும் போட்டியிட்டால், அ.தி.மு.க., வேட்பாளராக களமிறங்க உள்ள வி.என்.ரவியை எதிர்த்து தே.மு.தி.க., வெற்றி பெறுவது சிரமம் என, தி.மு.க., கருதுகிறது.

அதனால், பிரேமலதா அல்லது அவரது மகன் விஜய பிரபாகரன் இருவரில் ஒருவர் போட்டியிட்டால் வெற்றி உறுதி என்பதால், இருவரில் ஒருவர் போட்டியிட வேண்டும் என, தி.மு.க., தலைமை விரும்புகிறது.

ஆனால், விருத்தாசலம் தொகுதியில் போட்டியிடவே, பிரேமலதா விரும்புகிறார். கட்சி துவக்கிய முதல் தேர்தலில், விஜயகாந்த் வெற்றி பெற்ற தொகுதி. தனக்கும் வெற்றியை தரும் என, பிரேமலதா நம்புகிறார். தற்போது, அத்தொகுதி காங்கிரஸ் வசம் உள்ளது.

இதற்கிடையில், அ.தி.மு.க., கூட்டணியில், மயிலம் தொகுதி பா.ம.க., - எம்.எல்.ஏ., சிவக்குமார், விருத்தாசலத்தில் போட்டியிட விரும்புகிறார் என்றும், அ.தி.மு.க., முன்னாள் அமைச்சர் சி.வி.சண்முகம், மயிலம் தொகுதிக்கு மாறுகிறார் என்றும் கூறப்படுகிறது.

விருத்தாசலம் தொகுதியில், பா.ம.க., போட்டியிடுமானால் சுலபமாக வெற்றி பெறலாம் என, பிரேமலதா கருதுவதால், அத்தொகுதியை பிடிவாதமாக கேட்டு வருகிறார். மொத்தத்தில், விருத்தாசலமா அல்லது விருகம்பாக்கமா என்ற, குழப்பத்தில் இருக்கிறார் பிரேமலதா என்கின்றனர், அவரது கட்சியினர்.