முகத்தில் ஈயாடலை!

கட்சியின் மாஜி தலைவர் புதுச்சேரியில் பிரசாரத்தில் இருக்க, தாமரை கட்சியின் மேலிட பொறுப்பாளரான மத்திய அமைச்சர், திடுமென போன் போட்டு பேசி, தமிழகத்தின் தலைநகருக்கு வர வழைத்தனர். 'இம்முறை நீங்கள் தேர்தலில் போட்டியிட வேண்டும். தேவையானால், கொங்கு மாவட்டத்தில் கட்சிக்கு ஒதுக்கப்பட்டிருக்கும் வடக்குத் தொகுதியிலேயே கூட போட்டியிடலாம் என்று சொல்ல, அங்கு போட்டியிட காத்திருக்கும் பெண்மணி முகத்தில் ஈயாடவில்லையாம்.

போன் அலறல்!

தமிழக தலைநகரின் தோட்டப் பகுதியில் இருக்கும் மறைந்த தலைவரின் தோழிக்கு தேர்தலில் போட்டியிட ஆசை வந்து, தன் மீது நம்பிக்கையுள்ள பலரையும் போட்டியிட களம் இறக்கி உள்ளார். ஆனாலும், பல தொகுதிகளுக்கு ஆள் கிடைக்கவில்லையாம். இதனால், இலை கட்சியில் தனக்கு அறிமுகமானவர்கள் அனைவருக்கும் போன் போட்டு, போட்டியிட அழைக்கிறாராம். இதனால், பெண்மணியிடம் இருந்து போன் வந்தாலே, பலரும் அலறுகின்றனராம்.

பேச்சு பிடிக்கலை!

சூரிய கட்சியின் தலைவர், இரு நாட்களுக்கு முன் தன் சொந்த ஊருக்குச் சென்றாராம். அங்கு, கட்சி நிர்வாகிகளை வரவழைத்து பேசினாராம். அப்போது, 'ஆரூரில், நம்மை எதிர்த்து போட்டியிடும் தாமரை கட்சி சார்பில் போட்டியிட ஆளே கிடைக்கவில்லை. தேடிப்பிடித்து சிலரை பிடித்துள்ளனர். யார் போட்டியிட்டாலும் சூரிய வெற்றியை தடுக்க முடியாது' என்று நிர்வாகிகள் சொல்ல, 'ஜிங் ஜக்கா போடுவது பிடிக்கவில்லை' என்று, முகத்தை திருப்பிக் கொண்டாராம் தலைவர்.