டில்லியில் பிரதமர் மோடி பதவியேற்பு விழா கோலாகலம்: ஜனாதிபதி ராம்நாத் கோவிந்த் பதவி பிரமாணம்

புதுடில்லி: டில்லி, ஜனாதிபதி மாளிகையில், நேற்று நடந்த கோலாகலமான விழாவில், நரேந்திர தாமோதர தாஸ் மோடி, 68, பிரதமராக பதவியேற்றார். அவருக்கு, ஜனாதிபதி, ராம்நாத் கோவிந்த் பதவிப் பிரமாணமும், ரகசிய காப்பு பிரமாணமும் செய்து வைத்தார். ராஜ்நாத் சிங், பா.ஜ., தலைவர் அமித் ஷா உட்பட, மொத்தம், 57 பேர் அமைச்சர்களாக பதவியேற்றனர். இதில், 24 பேர் கேபினட் அமைச்சர்களாகவும், 24 பேர் இணை அமைச்சர்களாகவும், ஒன்பது பேர் தனிப் பொறுப்புடன், இணை அமைச்சர்களாகவும் பதவியேற்றனர்.

நாட்டின், 17வது லோக்சபாவுக்கு சமீபத்தில் நடந்த தேர்தலில், மொத்தமுள்ள, 543 தொகுதிகளில், 542 தொகுதிகளுக்கு தேர்தல் நடந்தது. வாக்காளருக்கு பணம் தர முயன்றதால், தமிழகத்தின் வேலுார் தொகுதிக்கு, தேர்தல் நடக்கவில்லை.

தேர்தல் நடந்த, 542 தொகுதி களில், பா.ஜ., 303 தொகுதி களில் வென்று, தனிப் பெரும்பான்மை பெற்றது. பா.ஜ., தலைமையிலான, தேசிய ஜனநாயகக் கூட்டணி, 353 தொகுதிகளில் வென்றது. காங்கிரஸ், 52 தொகுதிகளிலும், ஐக்கிய முற்போக்கு கூட்டணி, 91 தொகுதிகளிலும் வென்றன. பிற கட்சிகள், 98 இடங்களில் வென்றன.

இரண்டாவது முறை:



இதன் மூலம், தொடர்ந்து இரண்டாவது முறையாக, தேசிய ஜனநாயகக் கூட்டணி ஆட்சி அமைந்துள்ளது. இதையடுத்து, பிரதமர் நரேந்திர மோடி தலைமையிலான அரசு, பதவியேற்கும் விழா, டில்லி ஜனாதிபதி மாளிகையில், நேற்று கோலாகலமாக நடந்தது.விழாவில் பங்கேற்க, 8,000 பேருக்கு அழைப்பு விடுக்கப்பட்டு இருந்தது.

'பிம்ஸ்டெக்' எனப்படும் பலதுறைகளுக்கான தொழில்நுட்பம் மற்றும் பொருளாதார ஒத்துழைப்புக்கான வங்கக் கடல் ஒட்டிய நாடுகளின் தலைவர்கள், சிறப்பு விருந்தினராக அழைக்கப் பட்டு இருந்தனர். நம் நாட்டு அரசியல் தலைவர்கள், பல மாநில முதல்வர்கள், தொழிலதிபர்கள், திரையுலகப் பிரமுகர்கள், விளையாட்டுத் துறையினர் கலந்து கொண்டனர்.

காங்கிரஸ் தலைவர் ராகுல், மூத்த தலைவர், சோனியா, முன்னாள் பிரதமர், மன்மோகன் சிங் உள்ளிட்டோர் நிகழ்ச்சியில் பங்கேற்றனர்.ஜனாதிபதி மாளிகையின் முன்புறத்தில், விழாவுக் கான ஏற்பாடுகள் செய்யப்பட்டிருந்தன. விழா நடைபெறும் இடத்துக்கு மோடி வந்த பிறகு, துணை ஜனாதிபதி, வெங்கையா நாயுடு வந்தார். அவரைத் தொடர்ந்து, ஜனாதிபதி, ராம்நாத் கோவிந்த், அங்கு வந்தார்.

சரியாக இரவு, 7:00 மணிக்கு விழா துவங்கியது. முதலில் தேசிய கீதம் இசைக்கப் பட்டது. அதைத் தொடர்ந்து, நரேந்திர தாமோதர தாஸ் மோடி, பிரதமராக பதவி ஏற்கும் வகையில், ஜனாதிபதி, ராம்நாத் கோவிந்த், அவருக்கு, பதவிப் பிரமாணமும், ரகசிய காப்பு பிரமாணமும் செய்து வைத்தார்; இரு பிரமாணங் களையும், மோடி, ஹிந்தி மொழியில் வாசித்தார்.

57அமைச்சர்கள்



அவருக்கு, ஜனாதிபதி, ராம்நாத் கோவிந்த், வாழ்த்து தெரிவித்தார். அவர் பதவியேற்றதும், 'பாரத் மாதா கீ ஜே' என, அங்கிருந்தவர்கள் கோஷம் எழுப்பினர்.அவரைத் தொடர்ந்து, ராஜ்நாத் சிங், பா.ஜ., தலைவர், அமித் ஷா, நிதின் கட்கரி, சதானந்த கவுடா, நிர்மலா சீதாராமன், ராம் விலாஸ் பஸ்வான் உட்பட, 24 பேர் கேபினட் அமைச்சர்களாக பதவியேற்றனர்.

கடந்த முறை அமைச்சரவையில் இடம் பெற்றிருந்தவர்களில் பெரும்பாலானோர், மீண்டும் அமைச்சர்களாகி உள்ளனர். அமித் ஷா, அமைச்சரவையில் சேருவார் என்ற எதிர்பார்ப்பு ஏற்கனவே இருந்தது. ஆனால், வெளியுறவு செயலராக இருந்து, ஓய்வு பெற்ற, ஐ.எப்.எஸ்., அதிகாரி, ஜெய்சங்கர், அமைச்சராக நியமிக்கப்பட்டுள்ளது, எதிர்பாராத தேர்வு.வி.கே. சிங், ராம்தாஸ் அதவாலே, சாத்வி நிரஞ்சன் ஜோதி, பபுல் சுப்ரியோ, அனுராக் சிங் தாக்குர், வி.முரளிதரன் உட்பட, 24 பேர், இணையமைச்சர்களாக பதவிஏற்றனர்.

சந்தோஷ் குமார் கங்வார், ஜிதேந்திர சிங், கிரண் ரிஜுஜு, ஸ்ரீபத் யசோ நாயக் உள்பட, ஒன்பது பேர், தனிப் பொறுப்புடன் இணையமைச்சராகவும் பதவியேற்றனர். இரவு, 9:05க்கு தேசிய கீதத்துடன் பதவியேற்பு விழா நிறைவடைந்தது.

நிதிஷ் குமார் நிராகரிப்பு



தே.ஜ., கூட்டணி அரசில், பல கூட்டணி கட்சிகள் இடம்பெற்றுள்ளன. ஆனால், மத்திய அமைச்சரவையில் பங்கேற்கும் வாய்ப்பை, பீஹார் முதல்வரான, ஐக்கிய ஜனதா தள தலைவர், நிதிஷ் குமார் நிராகரித்து விட்டார்.

அவர் கூறியதாவது:மத்திய அமைச்சரவையில் கட்சிக்கு, ஒரு இடம் தருவதாக கூறினர். இந்த அடையாள பிரதிநிதித்துவம் தேவையில்லை என, கூறிவிட்டோம். இதனால், எங்களுக்கு எந்த வருத்தமும் இல்லை. நாங்கள், தொடர்ந்து, தேசிய ஜனநாயகக் கூட்டணியில், இடம் பெற்று உள்ளோம். இவ்வாறு அவர்கூறினார்.

'டிவி'யில் பார்த்தார்



நரேந்திர மோடி பிரதமராக பதவியேற்கும் விழாவை, அவருடைய தாய், ஹீராபென், 96, குஜராத்தில் உள்ள தன் வீட்டில், 'டிவி'யில் பார்த்து மகிழ்ந்தார். மோடி பதவியேற்றபோது, அவருக்கு, ஆசி வழங்கினார்.டில்லியில் நடந்த பதவியேற்பு விழாவில், தமிழக முதல்வர், இ.பி.எஸ்., துணை முதல்வர், பன்னீர்செல்வம், லோக்சபா முன்னாள் துணை சபாநாயகர், தம்பிதுரை பங்கேற்றனர்.

அ.தி.மு.க., சார்பில் பன்னீர்செல்வத்தின் மகன், ரவீந்திரநாத், வைத்திலிங்கம் ஆகியோர் அமைச்சரவையில் இடம்பெறுவர் என, எதிர்பார்க்கப்பட்டது. ஆனால், கூட்டணி அரசில், அந்தக் கட்சிக்கு வாய்ப்பு தரப்படவில்லை.மோடி அமைச்சரவையில், தமிழகத்தைச் சேர்ந்த, ஜெய்சங்கர் மற்றும் நிர்மலா சீதாராமன், அமைச்சர்களாக இடம்பெற்றுள்ளனர்.

மூத்த, ஐ.எப்.எஸ்., அதிகாரியாக பணியாற்றி, ஓய்வு பெற்ற, முன்னாள் வெளியுறவு செயலர், ஜெய்சங்கர், கேபினட் அமைச்சராக பதவியேற்றார். இவருடைய தந்தை, கே.சுப்ரமணியன், தமிழகத்தைச் சேர்ந்தவர்.அதேபோல், ராணுவ அமைச்சராக பணியாற்றிய, நிர்மலா சீதாராமனும், தமிழகத்தைச் சேர்ந்தவர். தற்போது, கர்நாடக மாநிலத்தில், ராஜ்யசபா, எம்.பி.,யாக உள்ளார் என்பது குறிப்பிடத்தக்கது.

இந்தியாவுக்கு சேவை புரிவதில் பெருமை அடைகிறேன்: டுவிட்டரில், மோடி



ஜெட்லி, சுஷ்மா இல்லைபிரதமர் நரேந்திர மோடி தலைமையிலான முந்தைய அரசில், முக்கிய துறைகளை கவனித்து வந்த, அருண் ஜெட்லி, சுஷ்மா சுவராஜ், இந்த முறை பதவியேற்க வில்லை. 'உடல்நலம் காரணமாக, தனக்கு மீண்டும் அமைச்சர் பதவி வேண்டாம்' என, நிதி அமைச்சராக பணியாற்றிய, அருண் ஜெட்லி கூறியிருந்தார்.

இது தொடர்பாக, நேற்று முன்தினம் அவர் அறிக்கை வெளியிட்டார். அதைத் தொடர்ந்து, மோடி அவரை நேரில் சந்தித்து பேசினார். இதனால், ஜெட்லி மீண்டும் சேருவாரா என்ற எதிர்பார்ப்பு ஏற்பட்டது. அதேபோல், வெளியுறவுத் துறை அமைச்சராக இருந்த, மூத்த தலைவர், சுஷ்மா சுவராஜும், இந்த முறை அமைச்சரவையில் இடம் பெறவில்லை; தேர்தலிலும் அவர் போட்டியிடவில்லை.

மற்றொரு மூத்த தலைவரான, மேனகாவும், அமைச்சரவையில் இடம்பெறவில்லை.கடந்த முறை அமைச்சரவையில் இடம்பெற்றிருந்த, ராஜ்யவர்தன் சிங் ரதோட், ஜெயந்த் சின்ஹா, ஜே.பி. நட்டா, அனந்த்குமார் ஹெக்டே, சுரேஷ் பிரபு ஆகியோருக்கும் மீண்டும் வாய்ப்பு அளிக்கப்படவில்லை.

மேனகா சபாநாயகர்?



நாட்டின், 17வது லோக்சபாவின், தற்காலிக சபாநாயகராக, பா.ஜ.,வின் மூத்த தலைவரும், எட்டு முறை, எம்.பி.,யான, மேனகா, 62, நியமிக்கப்படு வார் என, எதிர்பார்க்கப் படுகிறது.மோடி தலைமை யிலான முந்தைய அரசில், பெண்கள் மற்றும் குழந்தைகள் நலத் துறை அமைச்சராக அவர் பணியாற்றினார். தற்போதைய அமைச்சரவை யில் அவர் இடம்பெற வில்லை.

இந்நிலையில், அவர் தற்காலிக சபாநாயகராக நியமிக்கப்படுவார் என, எதிர்பார்க்கப்படுகிறது. புதிதாக தேர்ந்தெடுக்கப் பட்டுள்ள அனைத்து, எம்.பி.,க்களுக்கும், அவர் பதவிப் பிரமாணம் செய்து வைப்பார்.அதைத் தவிர, சபாநாயகர் மற்றும் துணை சபாநாயகரை தேர்வு செய்வதற்காக நடைபெறும், லோக்சபாவின் முதல் கூட்டத்தையும், தற்காலிக சபாநாயகர் நடத்துவார்.

அமைச்சரவையில் பெண்கள்



அமேதி தொகுதி எம்.பி., ஸ்மிரிதி இரானி உள்ளிட்ட ஆறு பெண் அமைச்சர்கள், மோடியின் புதிய அரசில் இடம் பெற்றுள்ளனர். கடந்த முறையை விட, இம்முறை பெண் அமைச்சர்களின் எண்ணிக்கை குறைந்து உள்ளது.லோக்சபா தேர்தலில், கடந்த முறையை விட அதிக பெண்கள் வெற்றி பெற்றாலும், இம்முறை, அமைச்சரவையில், அவர்களுக்கான பிரதிநிதித்துவம் குறைந்துள்ளது.

கடந்த முறை, மோடி அரசில் எட்டு பெண் அமைச்சர்கள் இடம் பெற்றிருந்தனர். இம்முறை, அது ஆறு பெண் அமைச்சர்களாக குறைந்து உள்ளது.முதல் முறையாக, ராணுவ பெண் அமைச்சராக பொறுப்பேற்ற நிர்மலா சீதாராமன், இம்முறையும் அமைச்சரவையில் சேர்க்கப்பட்டுள்ளார். சிரோன்மணி அகாலிதளம் கட்சியின் ஹர்சிம்ரத் கவுர் பாதல், 52, சாத்வி நிரஞ்சன் ஜோதி, 52, ரேணுகா சருதா, 55, தேவஸ்ரீ சவுத்ரி, 48, ஆகியோருக்கு அமைச்சர் பதவி கிடைத்துள்ளது.

புது முகங்கள்



இம்முறை, மோடி அரசில், 36 அமைச்சர்கள் மீண்டும் சேர்த்து கொள்ளப்பட்டு உள்ளனர். இவர்களில், முக்தர் அப்பாஸ் நக்வி மட்டுமே, முஸ்லிம் மதத்தை சேர்ந்த அமைச்சர். முதல் முறையாக, லோக்சபா தேர்தலில் வெற்றி பெற்றுள்ள, 20 எம்.பி.,க்களுக்கு, அமைச்சர் பதவி கிடைத்துள்ளது.



வாசகர் கருத்து

முதல் நபராக கருத்து தெரிவியுங்கள்!
Login via Dinamalar:
New to Dinamalar ?
(Press Ctrl+g or click this   to toggle between English and Tamil)