புதுடில்லி : சீக்கிய கலவரம் தொடர்பாக காங்., தலைவர் சாம் பிட்ரோடா தெரிவித்துள்ள கருத்திற்கு பதிலளித்துள்ள பா.ஜ., தலைவர் அமித்ஷா கொலைகார காங்.,ஐ அதன் பாவங்களுக்காக இந்தியா என்றும் மன்னிக்காது என தெரிவித்துள்ளார். 
1984ம் ஆண்டு நடந்த கலவரத்தின் போது சீக்கியர்களை கொல்லும்படி முன்னாள் பிரதமர் ராஜீவ் உத்தரவிட்டதாக பா.ஜ., கூறி இருந்தது. இது பா.ஜ.,வின் மற்றொரு பொய் என்றும், நடந்தது நடந்து விட்டது அதற்கு இப்போது என்ன? என காங்., தலைவர் சாம் பிட்ரோடா கருத்து தெரிவித்திருந்தார். இது தொடர்பாக பா.ஜ., தேசிய தலைவர் அமித்ஷா தனது டுவிட்டர் பக்கத்தில் கருத்து தெரிவித்துள்ளார்.
அதில் அவர், இது ஒட்டுமொத்த சீக்கிய சமுதாயத்தையம் வேதனைப்படுத்துவது. 1984 ல் காங்., தலைவர்களால் கொல்லப்பட்ட சீக்கிய குடும்பங்களை காயப்படுத்தும் வார்த்தைகள். டில்லியின் மதவாத பண்பாடு மீதான தாக்குதல். இவை அனைத்தையும் சாம் பிட்ரோடா சுருக்கமாக நடந்தது நடந்து விட்டது என கூறி உள்ளார். கொலைகார காங்.,ஐ அதன் பாவங்களுக்காக இந்தியா ஒரு போதும் மன்னிக்காது என தெரிவித்துள்ளார்.
இதற்கு பதிலளித்துள்ள சாம் பிட்ரோடா, சீக்கிய கலவரம் தொடர்பாக தான் கூறிய கருத்துக்களை பா.ஜ., திரித்து கூறுவதாகவும், தங்களின் தோல்விகளை இதில் மறைக்க பார்ப்பதாகவும் தெரிவித்துள்ளார்.
வாசகர் கருத்து