ராகுல் வீடுமுன் குவியும் தொண்டர்கள்

புதுடில்லி : காங்கிரஸ் கட்சி தலைவர் ராகுல், லோக்சபா தேர்தல் தோல்விக்கு பொறுப்பேற்று பதவி விலகுவதாக பிடிவாதம் பிடிப்பதாக கூறப்படுகிறது. இந்நிலையில் ராகுலே தலைவராக நீடிக்க வலியுறுத்தி டில்லியில் ராகுல் வீடு முன் மூத்த நிர்வாகிகள் மற்றும் தொண்டர்கள் குவிந்து வருகின்றனர்.

52 எம்.பி., சீட் :



நடந்து முடிந்த லோக்சபா தேர்தலில், மீண்டும் எதிர்க்கட்சி அந்தஸ்து கூட பெற இயலாமல் வெறும் 53 சீட்டுகளை மட்டுமே வென்று காங்கிரஸ் மோசமான தோல்வியை சந்தித்தது. அதிருப்தியடைந்த ராகுல், சமீபத்தில் நடந்த காங்கிரஸ் காரியக்கமிட்டி கூட்டத்தில் தலைவர் பதவியிலிருந்து விலக விரும்பினார். தலைவர்கள் அவரே நீடிக்க வலியுறுத்தினர். கட்சியை மறுசீரமைப்பு செய்யவும் அவருக்கு முழு அதிகாரம் அளித்து தீர்மானம் நிறைவேற்றப்பட்டது.

பிடிவாதம் :



எனினும், பதவி விலகும் முடிவில் ராகுல் தொடர்ந்து பிடிவாதமாக இருப்பதாக தகவல்கள் வெளியாகின. இதனை அடுத்து புதுடில்லியில் உள்ள ராகுல் வீடு முன்பு இன்று(மே 29) காங்கிரஸ் தொண்டர்கள் நுாற்றுக்கணக்கில் குவிந்தனர். டில்லி முன்னாள் முதல்வர் ஷீலா தீட்ஷித் உள்ளிட்ட மூத்த நிர்வாகிகள் ராகுல் வீட்டிற்குள் சென்று தொடர்ந்து சமாதானப்படுத்தும் முயற்சியில் ஈடுபட்டு வருகின்றனர்.

தமிழகம் :



இதேபோல தமிழகத்தின் தலைநகர் சென்னையிலும், ராகுலே காங்கிரஸ் தலைவராக நீடிக்க வலியுறுத்தி, மாநிலத் தலைவர் கே.எஸ்.அழகிரி, மூத்த தலைவர்கள் பங்கேற்ற பேரணி நடந்தது. தேனாம்பேட்டையில் தொடங்கிய பேரணி, காமராஜர் அரங்கம் முன் முடிந்தது. இதில் பங்கேற்றோர், ராகுல் தலைவராக நீடிக்க கோரி, கோஷங்களை எழுப்பினர்.

தீக்குளிப்பு :



பேரணியில் பங்கேற்ற தொண்டர் ஒருவர், தான் மறைத்து வைத்திருந்த பெட்ரோல் கேனை எடுத்து, திடீரென தனது உடலில் ஊற்றி, தீப்பற்ற வைக்க முயன்றுள்ளார். அவரிடமிருந்து கேனை பறித்து, தண்ணீரை ஊற்றியுள்ளனர் சக தொண்டர்கள்.

தமிழகம் மட்டுமின்றி பஞ்சாப் போன்ற சில மாநிலங்களிலும் ராகுலுக்கு ஆதரவான பேரணிகள் நடந்து வருகின்றன. புதுச்சேரி முதல்வர் நாராயணசாமி உள்ளிட்டோரும் தலைவராக நீடிக்க வேண்டுமென ராகுலுக்கு வேண்டுகோள் விடுத்துள்ளனர்.



வாசகர் கருத்து

முதல் நபராக கருத்து தெரிவியுங்கள்!
Login via Dinamalar:
New to Dinamalar ?
(Press Ctrl+g or click this   to toggle between English and Tamil)